KAWRUH BASA

1.      PURWAKANTHI

Purwakanthi tegese aksara, swara utawa tetembungan sing padha ing sajroning ukara. Ing basa Indonesia diarani persamaan bunyi utawa sajak. Purwakanthi kaperang dadi telu :

a.       Purwakanthi Guru Swara yaiku purwakanthi sing padha swara ing pungkasane tembung.

Tuladha :

-          Ana awan, ana pangan

-          Ngalah, nanging oleh

-          Sing salah, kudu seleh

-          Inggah-inggih, mboten kepanggih

-          Ana bungah, ana susah iku wis lumrah

b.      Purwakanthi Guru Sastra yaiku Purwakanthi sing padha tulisane utawa aksarane ing saben wiwitan wanda utawa tetembungane.

Tuladha:

-          Tata titi tutug tatag, tanggung tertib

-          Katula-tula ketali

-          Laras, lurus, leres, laris

-          Makuta, makuti, makuten

-          Sing weweh bakal wuwuh

-          Bobot, bibit, bebet

c.       Purwakanthi Lumaksita (Guru Basa) yaiku purwakanthi sing padha kabeh tetembungane.

Tuladha :

-          Asung bekti, bektine kawula marang Gusti

-          Lungguh dingklik, dingklike wong ciliki-cilik

-          Mangan ati, atine sing kelara-lara

-          Nandhang lara , larane wong lara lapa

-          Rujak degan, degane krambil ijo

-          Witing tresna, tresna mung sawetara

2.      WANGSALAN

Wangsalan yaiku unen-unen utawa tetembungan sing saemper cangkriman, nanging batangene wis dikandakake, mung anggone ngandakake ora kanthi melok, jelas utawa cetha. Nanging sarana disebutake sawanda utawa luwih.

Tuladha :

-          Jenang gula, kowe aja lali.(jenang gula = gulali)

-          Mbalung janur, gelema paring usada. (balung janur = sada)

-          Kembang jambu, kemaruk duwe dolanan anyar. (kembang jambu = karuk + dadi kemaruk)

-          Lawang gedhe tengah dalan, menawi lepat nyuwun ngapura. (Lawang gedhe tengah dalan = gapura)

3.      PARIKAN

Parikan yaiku tetembungan utawa unen-unen sing duweni pathokan utawa pugeran ajeg.

Ana 2 jenis parikan yaiku :

a.       Parikan sing dumadi saka rong gatra (parikan tunggal)

b.      Parikan sing dumadi saka patang gatra (parikan rangkep)

Tuladha :

-          Wedang bubuk, gula Jawa

Yen kepethuk, ati gela

-          Sepet-sepet, sawone mentah

Diempet-empet, selak ra betah

-          Manuk emprit, menclok godhong tebu

Dadi murid, sing sregep sinau

-          Manuk kutut, mangune ngganter

Yen ra nurut, bisa keblinger

-          Esuk nyuling sore nyuling, sulinge arek Surabaya

Esuk eling sore eling, sing dielingi ora rumangsa

-          Awan-awan aja keluyuran, ana pak mantri numpak sekuter

Kapan-kapan aku keturutan, duwe kanca sinau pinter